Kostaldetik ofizialtasunera

Flysch-aren ibilbidetik iritsi da eskualdera Euskal Selekzioaren Aldeko Mendi Martxa, eta harrera beroa jaso dute parte-hartzaileek Zumaia, Getaria, Zarautz eta Oriotik igaro direnean.

Atzerapenarekin, baina giro ezin hobean iritsi zen herenegun Euskal Selekzioaren Aldeko Mendi Martxa eskualdera. Mutrikutik, kostaz iritsi ziren Zumaiara, eta, jarraian, Getariara jo zuten; udaletxean harrera egin zien Nika Lertxundi alkateak. Arratsaldean Zarautzera iritsi ziren, eta ekitaldia egin zuten. Ibiltariek Gaztelekuan pasatu zuten gaua, eta atzo goizean abiatu ziren Donostiarantz, Orio igarota.