Gaurtik aurrera, uneoro egongo da zer egina Azpeitiko auzoan. Bihar hasiko dira jaiak ofizialki, Mantangorri balkoitik auzora jaisten denean; bosgarren urteurrena du aurten.
Sanjuandegiko jaiak larunbatean Umeen Egunarekin hasi baziren ere, gaurtik aurrera izango dute jaiek benetako mamia. Igandea bitartean, uneoro egongo da zer egina auzoan.Barraken eguna
Musika, jan-edana, jolasak, kirola... denetarik antolatu dute Sanjuandegin, eta gustu guztietako jendeak izango du festetan gozatzeko aukera. Hala ere, bihar hasiko dira festak ofizialki, Mantangorri balkoitik auzora jaistean. Gainera, jaitsiera berezia egingo du animalia kuttunak aurten, bosgarren urtea baitu jaiak estreinatzen.
Gaur, bestalde, barraken eguna da Sanjuandegin, eta ohi baino merkeago izango dituzte sarrerak Azpeitiko gaztetxoek. Buelta bakoitzeko euro bat ordaindu beharko dute edozein barrakatan ibiltzeko.