Aurreko udal hauteskundeetan bezala, aurten ere alkatetzara aurkezten direnen arteko debatea antolatu du Baleike aldizkariak Zumaian. Gaur egingo da, 18:30ean, Alondegiko Oxford aretoan. Bertaratu ezin dutenek streaming bidez jarraitu ahal izango dute zuzenean Internetez, baleike.eus webgunean.
EH Bilduko eta EAJko hautagaiek hartuko dute parte mahai inguru horretan; Alex Olidenek eta Oier Kortak, hurrenez hurren. PSE-EEko hautagai Arritxu Marañoni ere parte hartzeko gonbitea luzatu zion hedabideak, baina uko egin zion gonbidapenari. Moderatzaile lanetan Baleike-ko zuzendari Gorka Zabaleta arituko da.