POLITIKA // Maiatzaren 25ean egingo diren udal eta foru hauteskundeetarako hautes mahaietako kideak aukeratuko dituzte. Beti bezala, zozketa publikoak egingo dituzte egun hauetan herriz herri. Azpeitian eta Orion horretarako egunak jarri dituzte: Azpeitiko udaletxean, adibidez, datorren astelehenean egingo dute. Orion, berriz, asteartean egingo dute, 09:00etan, udaletxeko batzar aretoan.
Azkoitiko EAJk bihar aurkeztuko du hautagai taldea
AZKOITIA // Azkoitiko EAJk udal hauteskundeetarako aurkeztu duen hautagai zerrenda osoa jakinarazteko ekitaldia egingo du bihar. 19:00etan, Elkarguneko plazan argazkia aterako dute bertan bildutakoek. Ondoren, 19:30ean ekitaldia egingo dute, Elkarguneko Oteiza aretoan. Javier Zubizarreta da Azkoitiko EAJren alkategaia. Ekainean jakinarazi zuten. Jeltzaleen hautagai zerrendan bigarrena, berriz, Ana Azkoitia da.