Lagun Onak txirrindulari elkarteak antolatuta, XXXV. Azpeitia Saria jokatuko dute bihar inguruko txirrindulari gazteek. 100 ziklista inguru espero dituzte; eta, urtero legez, proba jendetsua izango da biharkoa. Kadeteak, 15 eta 16 urteko gaztetxoak, lehiatuko dira Azpeitia eta Zumaia bitarteko errepideetan egingo duten lasterketan.
Azpeitiko plazan emango diote hasiera probari, 16:00etan. Herritik Urrestillara joango dira, eta honako ibilbidea egingo dute ondoren: Landeta, Loiola, Landeta, Zestoa, Iraeta, Aizarnazabal, Oikia, Iraeta, Zestoa eta Azpeitia. Helmuga, beste urteetan bezala, Arana kalean izango dute, 17:15ak inguruan.
Lagun Onak Txirrindulari elkarteko ziklistek ere parte hartuko dute proban. Taldeko zuzendarien arabera, beraien helburua lehen urteko ziklista gazteek lasterketetan ibiltzen ikastea da.