Eduki hau partekatzeko esteka arbelera kopiatu da.
Zumaiako Udaleko Euskara Zerbitzuak literatura tailerra antolatu du urte hasierarako, eta aurtengoan Yolanda Arrieta idazlea izango da irakaslea. Bizitzaren poetika, hitzezko argazkiak izenburua du ikastaroak, eta idazkera sortzailea landuko dute bertan: hitza, poesia, literatura eta fikzioa oinarri hartuta, norbere baliabideak deskubritzeko aukera izango dute ikastaroan parte hartzen dutenek.
Tailerra 12 ordukoa izango da; urtarrilaren 24tik otsailaren 14ra bitartean larunbatetan 10:00etatik 13:00etara egingo dituzte saioak, Alondegian.
Ikastaroan parte hartu nahi dutenek izena emateko aukera izango dute hilaren 16ra bitartean Euskara Zerbitzuan,
943-865025 telefono zenbakira hots eginda edo korreo elektronikoz, euskara@zumaia.net helbidera idatzita. Ikastaroan parte hartzeko 30 euro ordaindu beharko dituzte herritarrek.