Ainara Larrañaga: "Azoka Herritik Xanjuandei Auzolaneanen helburuekin bat dator"

Ainara Larrañaga Xanjuandei Auzolaneaneko kidea (Nerea Uranga/Hitza). Azpeitiko I. Kooperazio Astea antolatu dute larunbatean hasi eta abenduaren 20ra bitartean. Herrian kooperazioko proiektu desberdinetan ari diren eragileek hartuko dute parte. Asteari bukaera hilaren 20an Sanjuandegin egingo duten Azoka Herritik, herria auzoetatik lelo hartuta egingo den egun osoko ekitaldiarekin emango zaio. Ainara Larrañaga (Azpeitia, Sanjuandegi, 1990) Xanjuandei Auzolanean-eko kidea da. Iaz haurrei zuzendutako bigarren eskuko azoka egin zenuten auzoan, eta aurten apustu berri bat egingo duzue. Zergatik? Azken bi urteetan Azpeitiko kalean Azoka Herritik egin izan da, eta aurten Gabonak aurretik Sanjoandegin egitea proposatu ziguten. Hasieran, bigarren eskuko azoka zabalago batekin pentsatzen hasi ginen, denetako materiala jasoz eta salduz. Gero, ordea, baserritarrak eta herriko artisauak gonbidatu genituen parte hartzera, eta animatu egin ziren. Pixkanaka handitzen joan da, eta gauza dezente gehitu dira. Azpeitiko Kultur Mahaiak ere parte hartuko du, eta hainbat ekintza antolatuko dituzte egunean zehar. Gainera, Kooperazio Astearen azken eguna izango denez, munduko jolasak eta ipuin kontaketa bat ere egongo dira; euskaratutako Nepalgo ipuin bat kontatuko dute. Azkenean, azoka handi bat. Bai, ez genuen espero horrelako bolumena hartuko zuenik, baina eragileak gehitzen joan dira eta baita parte hartzea ere, eta ekintza piloa eta era askotako postuak egongo dira. Azoka Herritik, herria auzoetatik lelo hartuta antolatu duzue. Xanjuandei Auzolanean elkartearen helburu nagusia auzoa biziberritzea da, edozein ikuspegitik auzoan bizia egotea da gure nahia. Gero, horren barruan beste xede batzuk baditugu: gai sozialetan jardutea, euskara bultzatzea, auzo izaera sortzea... Azkenean, proiektu hau gure helburu guztiekin bat dator: azoka euskaraz egingo da, beharrean daudenen egoerari begira bigarren eskuko azoka egingo da, eta bertako dendak, artisauak eta baserritarrak bultzatzeko ere bada. Bigarren Eskuko Azokarako materiala Elkar-ekinekin batera bilduko duzue, ezta? Hori da, haurrentzako jolasak eta denetariko materialak jasoko ditugu, eta auzo lokalean ere materiala biltzen jardungo dugu hilaren 17ra bitartean. Donazio bezala jasoko dugu materiala, eta prezio sinboliko batean salduko. Udaleko Gizarte Zerbitzuetatik bideratuta herrian behar handiena duten familietako haurrek nahi duten jostailu bat hartzeko bono bat edukiko dute. Gero, hor bilduko den dirua gai sozialetako ekitaldiak antolatzeko erabiliko da. Xanjuandei Auzolanean-ek auzo lokal bat badu, zer funtzio du? Gaur egun auzoko lokala alokairuan hartuta dugu, eta udalak diruz laguntzen digu alokairua ordaintzeko. Baina, igerilekuko eraikina handitzen ari dira, eta gero han izango dugu auzo lokala. Otsail bukaerako edo martxorako bukatuta egongo dela esan digute. Lokalaren obrak ikusi ditugu, eta gustura gaude. Lokalean auzo taldekook bilerak egiten ditugu, eta auzotarrek erabiltzeko irekia da. Meriendak, bazkariak... egiten dira. Euskarazko mintzapraktikak egiteko ere bertan biltzen dira.