Sanpelaioen balorazioa egin du batzordeak. Eskerrak eman dizkiete herritarrei festetan emandako erantzunagatik: "Aurtengo egitarau anitzean hamaika kontu izan ditugu eta zarauztarrek parte hartze izugarria izan du. Plazera da herriko festak antolatzea herriaren halako erantzuna izanda: umeentzako ikuskizunean, DJkin dantzan, paella lehiaketan eta abar. Eskerrik asko". Aurten txosna gunean ez dela salatutako eraso sexistarik izan, eta hori "poztekoa" dela nabarmendu dute kideek: "Lanaren poderioz txosnagunea eremu libreagoa eta askeagoa izatea da Gurekin Jairen helburuetako bat, eta horretan jarraituko dugu eraso sexista guztiekin amaitu arte; aurtengoan identifikatu gabe edota salatu gabe geratu diren horiekin ere amaitu arte".
Guztia ez dela "positiboa" izan aitortu dute. Izan ere, presentzia poliziala handia izan da Gurekin Jairen arabera: "Ia etenik gabe izan dira indar polizialak txosnagunearen jira bueltan". "Probokaziotzat jo daitekeen hau gogor" salatu du festa batzordeak: "Argi eta garbi azaldu nahi dugu, gu geu txosnagunea kudeatzeko gai bagarela, eta ez dugula presentzia polizialik nahi. Beharrezkotzat joko bagenu, arduratuko ginateke jakinarazten".