Eduki hau partekatzeko esteka arbelera kopiatu da.
Azkoitiko Matadeiko Antzerki Jardunaldiak etzi, igandea, amaituko dira, ia lau hilabetetan zortzi saio eskaini ondoren. Bi antzezlan izango dira jardunaldien amaieran; Stereo eta Eguzkilore.
Stereo antzezlana Miren Gaztañagak sortu, zuzendu eta antzezten du. Antzerkia eta dantza uztartuz, maskulinitatearen eta feminitatearen inguruko hausnarketa egiten du obraren bidez, lagunekin izandako solasaldiak oinarri izanda.
Eguzkilore, berriz, Ane Arenas eta Erika Olaizola aktore azpeitiarrek sortu eta antzeztutako antzezlan laburra da. Taldeak berak azaldu duenez, «jaio da, iritsi da mundu honen lurrazalera antzerki honetako protagonista. Bi narratzailek erditu eta azalduko digute haren istorioa. Zerk egin lezake ba horren berezi hau guztia? Agian, bakoitzaren istorioak badu zeresanik ispilu honen aurrean jartzerakoan. Agian, zeu izan zintezke protagonista». 19:00etan hasiko dira antzezlanak, Matadeixen.