Laskorain Ikastolak kilometroetako testigua Orioko Herri Ikastolari eman zionetik ekintzak antolatu eta antolatu dabiltza Erria Txikota! lelopean. Atzo Kilometroetako abestia aurkeztu zuten Donostiako Koldo Mitxelena kulturgunean. Gaur, ordea, beste doinu batzuek izango dute protagonismoa; Gabrielen Arestiren baitan sortutakoek.
Sortu berria den Gabriel Aresti kultur elkartearen egitasmoa da Gabrielen lekua ikuskizuna. Irabazi asmorik gabeko elkarte honen helburua Gabriel Arestiren ondarea ezagutaraztea da, idazle gisa zein pertsona legez, egun, inoiz baino presenteago baitago. Belaunaldi batzuentzat gogora ekartzea izango da; beste batzuentzat deskubrimendua.
Ordu eta erdi inguruko ikuskizuna izango da. Hainbat kultura adierazpide elkartuko dira oholtzan: musika, bertsolaritza, deklamazioa, ikus-entzunezkoak…eta KARKARAk horietako bi elkarrizketatu ditu: Rafa Rueda eta Ainhoa Alberdi.