Bizitzaren dantza da biodantza. Musikak sortzen dituen sentimenduak eta mugimendua erabiltzen ditu norberaren kontzientzian sakontzeko, eragiteko. Emozioen eta adierazpenen bitartez, norberaren integrazioa sustatzea du helburu, hortaz, biodantzak. Naturarekin eta pertsonen arteko harremanak mantentzea bultzatzen du, baita horietan sakontzea ere. Gizakia ulertzeko modu berri bat da, laburbilduz, biodantza.
Guzti hau jorratuko duen hitzaldia antolatu du Mandalara Elkarteak. Hilaren 5ean, asteazkenean, 19:00etatik 20:00etara Orioko Kultur Etxean. Bizipenetan oinarrituta bizitza hobetzeko helburua duen hitzaldi hau Ainhoa Oterminek emango du eta bi zati izango ditu: alderdi teorikoa eta alderdi praktikoa.
Honenbestez, bizi-kalitatea hobetzeko beharrez bazaude biodantza izan daiteke hori lortzeko bidea. Izan ere, harreman estuak sortzen eta mantentzen laguntzen du, pakean, armonian, errespetuz, konfiantzaz, ziur eta libre bizi gaitezen.
Mandalara tailerraren data aldaketa
Normalean hileko lehen larunbatean egiten dute tailerra, baina oraingo honetan, martxoaren 15ean egingo dute. 10:00etan hasiko da eta lau ordu iraungo ditu, hau da, 14:00 amaituko da. Tailerrak emango dituena Karmele Garmendia izango da.