Kontatu pixka
bat zertan zabiltzan Brasilen
Erasmus antzeko
unibertsitate trukeko programa baten bitartez Brasilera etortzeko aukera
zegoela ikusi nuen, eta batukadak eta perkusioa niganako duen erakarpena
ikusirik, bi aldiz pentsatu gabe eskaera egin nuen.
Nolatan
aukeratu duzu Brasil? eta Salvador?
Perkusioa eta
batukadak ziren nire helburu nagusi eta bakarretarikoak. Izan ere, nik berez ez
nuen espero karreran urte bete kanpoan igarotzerik, baina Brasil ikusi nuenean
kartelean, eta gero Salvadorreko aukera, Hau dek neria!! pentsatu
nuen. Eta hementxe nago, perkusio brasildarra eta erritmo afrikarren nahasketa
handienetakoa dagoen lekuan...
Inauterietako
giroa nabarituko da jada ezta?
Egun gutxi falta
dira, eta jada guztia muntatuta dute, baina duela denbora dezentetik, gero eta
nabariagoak dira batukada talde edo Blocoen asteroko entseguak,
Inauterietara begira kale eta azpiegituren erreformak, ezagutzen dudan ia jende
guztia jada etxez ere aldatu behar izan da Inauteri garairako... Bai, egia esan
nahiko inauteri giroan gaude.
Bertako
batukada batekin joko duzu inauterietan. Nola sortu zen ideia?
Egia esan, hona
etortzearen helburua hemengo perkusioa ikastea zen, eta talde batean jotzea.
Hasieratik izan dut hori buruan, eta horretan egia esan jende askok lagundu
dit. Iruñeako Masaranduba batukadako lagun batzuk adibidez gomendio asko eman
dizkidate, baina bata eta bestea direla, azkenean hemen ezagutu nuen lagun
baten bitartez lortu dut aukera paregabe hau. Hiru hilabete inguru neramatzan
perkusioa ikasten irakasle batekin, baina hark ez dauka talderik eta harekin ez
nuen jotzeko aukerarik izango, beraz, jende ezberdinari galdezka hasi nintzen.
Horietako bat emakume brasildar bat da, etorri eta berehala ezagutu genuen bat.
Hark gomendatu zidan bere lagun perkusio-jole bat, berarekin hitz egin nuen eta bere taldean hasi nintzen.
Zein batukada
estilo eta zein instrumentu joko duzu?
Aipatutako
perkusio-jole honek, Maracatú estiloko batukada talde bat zuzentzen
du, eta talde horretan joko dut. Kasualitatez ordea, aurten lehenengo aldiz
Salvadorren Maracatú talde ezberdinak batuta Bloco handi bat ateratzeko
proiektu bat antolatu du musikari nahiko famatu batek eta entsegu dezente egin
ostean, talde honekin ere joko dut. Instrumentua, ez da Orion ikusi izan diguzuen
horietakoa. Guk erabiltzen genituen danbor handi horietako baten antzekoa da,
baina egurrezkoa eta larruzko partxeekin. Alfaia izena du, eta
egurrezko bi baketekin jotzen da, normalean bat bestea baino lodiago izaten da.
Orion ere
batukada batean jotzen zenuen
Bai. Esan
genezake azken batukada taldearen sortzaileetako bat izan nintzela, eta haren
zuzendaria. Egia esan hemendik asko eskertzen diet mundu honetan sartzera
bultzatu nindutenei, batez ere Ikastolari, haiek ez bazuten ikastaro hura
antolatu duela bost urte, agian ez bainintzake hemen egongo. Hala ere,
konturatu naiz batukadek Euskal Herrian igoera handia badute ere, kalitatea eta
zentzua falta zaiela askori. Izan ere, batukada askok perkusioa jotzen dute,
baina oso ondo jakin gabe zer ari diren jotzen edo ez dakit nola esan... Nik
adibidez, hango batukadarekin Marakatu eta Samba Reggae
izeneko erritmoak jotzen nituen, eta hona heldu naizenean konturatu naiz jotzen
genuenak Maracatútik eta Samba-Reggaetik oso gutxi zutela... Iruditzen zait
baita perkusioa eboluzionatzen joan behar duen gauza bat dela, baina eboluzio
hori emateko, lehenik jatorria edo erritmoen zentzu pixka bat jakitea ondo
egongo litzatekeelakoan nago.
Hemendik
inauterietan jotzeko ideiarekin joan zinen ala han sortu zen?
Egia esan ez nuen
nahi obsesio bat izatea inauterietan jotzearena, baina ideia hura buruan
nenbilkien, eta hona etorri eta lortuko ez nuela uste nuen uneetan nahiko
gaizki pasatu nuen. Han pentsatuta nuen bezala ez zaizkit atera gauzak, baina
nik uste dut aberasgarria izan dela gauzak espontaneotasun puntu batekin gertatu
izana.
Zer ematen
dizu esperientzia honek?
Erabat aberasgarria izango da, alde guztietatik. Hasteko, orain arte hartu ditudan klaseekin formakuntza tekniko onargarri bat lortu dudala iruditzen zait, eta inauterietako entseguekin, Maracatuko erritmoen kontrol handi xamar bat. Inauterietan jotzea bera, fisikoki erronka handi bat izango da, izan ere, lau ordu jarraian jotzea aste batean zazpi aldiz, sekula egin ez dudan gauza bat da. Eta inauteri hauen ostean, perkusio gehiago ikasten jarraitzea pentsatzen dut, eta Euskal Herrira itzultzean, nola ez, nonbait jotzen segitzea.