Karlos Perona: Bizitzan zehar klarinetea eskuan

Oriotar askori arraunlarien ongietorriko doinuak entzun orduko Karlos Peronaren irudia datorkio gogora. Ezagutzen zutenek «musikari apala eta langilea» izateagatik gogoratzen dute; klarinetea hartuta gazteei musikarako zaletasuna zabaltzeko prest zelako beti. Perona herenegun hil zen 92 urterekin, baina oriotarrek beti izango dute gogoan. Izan ere, 1975-1976an herriko txaranga sortu zuen seme, lagun eta familiako kideekin, eta klarinetea eskuan hartuta hamaika aldiz alaitu zituen arraunlarien ongi-etorriak. Joseba Aparicio musikariak hala gogoratzen du: «Txaranga sortzeko ezinbesteko pieza izan zen. Oriok estropada bat irabazi orduko instrumentua prest jarri eta deika hasten zen guztiok bildu eta plazara hurbiltzeko. Peronatar kastako aitona: beragatik izan ez balitz, Orioko txarangarik ez litzateke izango», azaldu du. Herrian musika doinuak zabaltzeaz gain, musikarako zaletasuna ere zabaldu zuen: hainbat gazteren artean alde batetik, eta bestetik, familian; semeek eta bilobek, denek jarraitu dutelako aitonaren grina. paiora larrañaga