Harrietan zintzilik (Alex Berasategi)
Kirolgi Fundazioaren XII. Kirol Argazkien Lehiaketako saridunak jakitera eman dituzte, eta B atalean, koloretako argazkien modalitatean, Alex Berasategi azpeitiarraren eta Luis Llavori zumaiarraren irudi bana hautatu dituzte. Bigarren saria eman diote Berasategiri Harrietan zintzilik lanagatik, eta hirugarren saria Llavoriri, Uretan 1 lanagatik. Biak ala biak oso pozik agertu dira lorpenarekin.
Berasategik urtebete baino ez darama argazkilaritzan, eta honakoa Gipuzkoa mailan jasotzen duen lehen saria du; aurretik beste bi sari lortuak zituen, baina herriko inauterietan. Gainera, azken momentuan aurkeztu zen lehiaketara. «Gure atalean irabazi duenak eman zidan lehiaketaren berri, duela hiru aste inguru, argazki rally batean, eta parte-hartzera animatu ninduen. Buruari buelta batzuk eman ondoren, kiroletako argazki dezente banuela konturatu nintzen, eta haietako bat bidaltzea erabaki nuen. Sariak honetan jarraitzera motibatzen zaitu. Bide onetik ari garela lanean, hain zuzen ere».
Ezohiko eremuan
Sari guztiak dira pozgarriak, baina Kirolgi Fundazioak emandakoak «sekulako ilusioa» egin diola aitortu du Llavorik. «Kirol argazkilaritzako lehiaketa batera nire argazki bat aurkezten nuen lehen aldia zen, eta animatu bezain pronto hirugarren saria jasotzea, benetan pozgarria izan da». Kirol eremuko argazkiak ez dira oso ohikoak bere argazkigintzan; izan ere, egile argazkilaritzan eta naturako argazkilaritzan da espezialistabatez ere. Alde horretatik, erronka berria izan dela onartu du.
Uretan 1 (Luis Llavori)
Berasategi ere ez da kirol argazkilaria; argazkilaritzan daraman urtean denetariko gaiak ukitu dituela jakitera eman du. Argazki saritua lagunak eskalatzen ari ziren egun batean atera zuen. «Zumaia eta Getaria artean eskalatzeko harkaitz onak daude, eta gure kuadrillaz gain, jende gehiago zebilen bertan. Argazki sarituan ageri dena ez nuen ezagutzen, han zebilenetako bat gehiago baitzen. Argazkia ateratzeko baimena eskatu nion, eta halaxe egin nuen. Egia esan, irudiarekin gustura geratu nintzen, argi oso ona zuelako».
Harrietatik uretara
Llavoriren argazkian, berriz, piraguista bat ageri da Zumaiako errioan arraunean. «Osagarri gisa, parrokia eta bere ingurua modu koloretsuan islatzen da errioan, eta horrek bat-bateko argazkia edertzen du», aditzera eman du. San Telmo jaien bezpera aurreko egunean atera zuen, Santiagoko paduran orkideei buruzko argazki erreportajea egiten aritu ondoren. «Etxera bidean, ontziolen ondoko oinezkoen zubia pasatzen ari nintzela, kaia aldera zihoan piraguista bat ikusi nuen. Errio ingurua behatu, eta piraguistaren irudia uretako islarekin konposatu nahian, kamera klikatu eta argazki hori atera nuen», kontatu du argazkilariak.
Kirolgi Fundazioaren XII. Kirol Argazkien Lehiaketako sari banaketa ekitaldia datorren astean egingo dute, abenduaren 12an, Gipuzkoako Argazkilari Elkarteak Donostian duen egoitzan. Orduan jasoko dute Berasategik eta Llavorik merezitako saria.
