Gaur goizean Zarauztarra Txirrindulari Taldeak denboraldi berriari hasiera emateko asmoz 2013 denboraldiko aurkezpen ekitaldia egin du Zarauzko Aritzbatalde Kiroldegian. Bertan izan dira taldeko txirrindulari eta arduradunak, baita lasterketero euren seme-alabekin batera batetik bestera ibiltzen diren gurasoak ere. Ekitaldia alaitzeko trikitilariek Fandango eta Ari-arina jo dituzte; Andoni Egaña eta Beñat Jauregi bertsolariek txirrindulariek denboraldia gogoz eta ilusioz abiatu dezaten bertso batzuk eskaini dizkiete Zarauztarra taldeko kideei. Txirrindularien omenez dantzatutako Agurrarekin eman diete amaiera ekitaldiari.
