Bihar, ostirala, itzuliko da ETB-1era Hitzetik Hortzera telebista saioa, Jon Artano zestoarra zuzendari eta aurkezle duela. Denboraldi honetan ostiraletan, ordutegi nagusian, 21:00etan hasita emango dute. Gero saioa berriro igandetan emango dute, 15:00etan. Horrez gain, eitb.com-en eta EITB Nahieran-en ikusteko aukera ere eskainiko dute.
Hainbat aldaketarekin dator Hitzetik Hortzera saioa. Ez du platorik izango eta Artanok toki batetik bestera ibili beharko du bertsolaritzako isotorioei segika. Bertso munduko protagonistak tokian-tokian elkarrizketatuko dituzte, eta plazaz plaza bildutako bertso saioak ere bilduko dituzte saioan. Denboraldi berriko aurreneko saioan (bihar emango dutenean), Iruñako Bertsoaroan izango da Hitzetik Hortzera; Atarrabiako Gaztetxean ere egingo du geldialdia Oskar Estangarekin arituz. Gaintzako bertsolariak euskal kantak eta batukada nahastuko dituen taldea sortu du, eta entseguan izan da telebistako saioa; Xilabako txapeldun Amets Arzallusekin ere egon dira lehen saio hau osatzeko, eta Arzallusi urtebetetzeko oparia egin diote.
