Urriaren 21eko Legebiltzarreko Hauteskundeetan getariarrek EH Bilduri eman dieten babesagatik, Getariako EH Bilduk eskerrak eman dizkie herritarrei. “Oso emaitza onak lortu ditugu Getarian, 748 boto eskuratu baititugu. Jaso dugun babesarekin pozik egoteko moduan gaude. 2011ko maiatzeko Udal eta Foru Aldundiko hauteskundeetan zein azaroan egin ziren Espainiar estatuko hauteskundeetan gertatu bezala, indar bozkatuena izan gara oraingoan ere” azaldu dute.
Herritarrengandik jaso duten babesak euren proiektu eta lanak aurrera ateratzen jarraitzeko laguntza eta hauspoa eman dio Getariako EH Bilduri, “orain arte bezala, ilusioz, gogoz eta konpromisoarekin lanean jarraituko dugu”.