Azalera handia hartu zuten garrek atzo Talaimendin (Aiora Larrañaga/Hitza)
Atzo eguerdi partean sutea izan zen Talaimendi mendiaren magalean, eta azalera handi bat erreta geratu da horren ondorioz. Garren neurriaren zenbatekoa argi erakusten du zelai berdeen artean ikusten den zatia beltzak. Sutea 13:30ak ingururako kontrolatuta zuten suhiltzaileek.
Bizilagun baten abisua
Atzo 11:34ean Zarauzko Udaltzaingoak Zarauzko bizilagun baten deia jaso zuen, Talaimendi mendiaren magala sutan zegoela ohartaraziz. Zehazki araztegia eta goiko kanpinera igotzeko pasabidearen arteko eremua izan zen erretzen ari zen eremua, eta hondartzatik argi ikus zitekeen kea.
Berehala bertaratu ziren suhiltzaileak sutearen gunera: bi kamioi eta auto bat, zehazki. Hasiera batean suhiltzaileak behekaldetik sua itzaltzen saiatu ziren, baina garrek azalera handia hartzen zuela ohartuta, Zarauzko kanpinera igo zen kamioi bat, eta bestea behekaldean geratu zen; Biotopoaren pasabidean, hain zuzen ere.
Ikerketa zabalik
Ezustean hartu ditua suteak herritarrak, eta Jabier Etxaburu Udaltzaingoaren arduradunak jakinarazi duenez, kea «oso deigarria» izan da. Gertakaria argitzeko ikerketa abiatuko dute.