Asteburuan hainbat pilota partida ikusteko aukera egongo da Zestoan. Ostiral honetan, ekainak 22, Zestoako pilotako denboraldi bukaerako jaialdia jokatuko da Frontoi Zaharrean (eguraldi txarra egiten badu kiroldegian). 18:30ean hasiko da pilota jaialdia, bertan herriko pilotari federatuek hartuko dute parte. Gaztetxoetan, Zubizarreta eta Irurek Miranda eta Odriozolaren aurka jokatuko dute; gazteetan, Adonis eta Arantzetak Perez eta Aranberriren kontra; eta, nagusietan, Artetxe eta Azagirre Salegi eta Loiolaren aurka ariko dira.
Larunbatean, ekainak 23, berriz, Gipuzkoako Talentudunen finalak jokatuko dira, 17:00etan. Orduan, alebinetan Aranguren usurbildarrak Egiguren azpeitiarraren kontra jokatuko du; eta, infantiletan, Aizpuru andoaindarrak Moron arrasatearraren aurka.
Igandean, ekainak 24, Gipuzkoako Mendebalde Txapelketako lauterdiko finalak jokatuko dira Zestoako kiroldegian, 10:00etan hasita. Lehen mailako kadeteetan Aranberri zestoarrak Egiburu lazkaotarraren kontra jokatuko du.