Iganderako, ekainak 10, Urola ibaia garbitzeko bigarren auzolana antolatu du Zestoako Udalak. Ibaiaren bi zati garbituko dituzte: Arozena hotelaren atzetik hasi eta Zubimusuko zubiraino arteko tartea eta Errotazar baserritik hasi eta Artzubiagako zubirainokoa. 09:00etatik 12:00ak bitartean jardungo dute garbiketa lanetan. Auzolanean parte hartuko dutenak Lau Iturrin elkartuko dira 09:00etan, eta lana bukatutakoan hamaiketakoa hasierako tokian egingo dute.
Auzolanean parte hartzera animatu ditu Zestoako Udalak, eta aurretik izena eman gabe izan arren, igandean bertan azaldu daitekeela esan dute.