Herritarren eta esne ekoizleen zuzeneko harremana bermatze aldera, Etxetxo baserrikoek esne makina jarri dute Eroski saltoki handiaren aldamenean; aparkalekuaren sarreran dago gailua, Hegoalde kalean. Duela orduerdi jarri dute erabilgarri, eta lehen ordurako herritar ugari gerturatu da, nola funtzionatzen duen ezagutzera, baina baita esnea erostera ere. Gaur, estreinako eguna izanda, Etxetxo baserriko lagunak bertan izango dira 12:00ak arte, esnea jasotzeko kristalezko eta plastikozko botilak doan banatzen eta erosleei makinatik esnea nola erosi azaltzen. Beraz, aurrerantzean zarauztarrek eguneko eta bertako esnea erosteko aukera izango dute bertatik bertara; euro batekin litro bat eta 50 zentimorekin litro erdia, hain zuzen ere.
