Asteburuetan plaza ibilgailuentzat ixtea aztertuko du udalak

Orioko Udaleko Bilduk asteburutan herriko plaza soilik oinezkoentzako izatea proposatuko du obren eta zerbitzuen batzordean. Koalizioak adierazi duenez, larunbat eta igandetan plaza inguruan «jende dezente» elkartzen da, eta herritarren «lasaitasuna eta erosotasuna» bermatzeko ezarri nahi dute neurria. Hori hala izanik, «plaza herritarren bilgune» izatea nahi dute, oinezkoak «aisia gunean eroso» ibil daitezen: «Familiek, haurrek eta gaztetxoenek lasai ibiltzeko aukera izan dezaten nahi dugu». Horrez gain, trafikoak sortu ditzakeen «arriskuak» sahiestu nahi ditu Bilduk. Koalizioak mahai gainean jarritako proposamena aztertuko du batzordeak; proposamenak aurrera egingo balu, festetan egiten dituzten trafiko aldaketak izango dira larunbat eta igandeetan; hau da, Kaian zirkulazio norabidea aldatu egingo dute, eta ibilgaluak bertatik sartuko dira herrira; Oriotik irteteko, berriz, Txanka hondartzako errepidea erabili beharko dute ibilgailuek.