PSE-EE taldearen arabera, Bilduk ez du birziklatu nahi: “Bilduk gaikako hondakin bilketa boikoteatzen ari da. Egungo sistemak modu eraginkorrean funtzionatzen du eta herritarrekin elkarlanean bultzatu behar da. Hori horrela, Bilduk zergatik kendu nahi ditu edukiontziok eta horren ordez bilketa sistema deseroso eta garestia inposatu? Zein interes ilun daude horren atzean?”. Bestalde, Bilduk Garbitania elkarteari 14.000 euro ordaindu izana salatu du, herrian atez atekoa bideragarria den ala ez aztertzeko. “Nondik atera dute diru kopuru hori? Garbitaniako haien lagunei ordaindu ahal izateko zer utzi dute ordaindu gabe? Susmagarria da, oso”.
Alderdi sozialistak bosgarren edukiontziaren erabilera bultzatzen jarraituko duela nabarmendu du, eta atez ateko bilketa sistemaren inposaketa arbuiatzen duela. “Beiraren, papelaren, pilen, plastikozko ontzien eta olio begetalen birziklatzeak emaitza onak eman ditu, birziklatze tasa gorantz doa. Edukiontzi marroiak pixkana-pixkana ari dira ezartzen, konpostatze azpiegiturak eraikintzen eta kontzientziazio kanpainak abiatzen ari diren heinean. Horri esker, egun ia 5.000 familia zarauztarrek erabiltzen dute aipatu edukiontzia”, nabarmendu du PSE-EEko bozeramaile Patxi Elolak. Ildo horretatik, edukiontzi marroia bultzatzen jarraitzea Bilduren ardura dela dio: “Bilduk, ordea, entzungor egin dio organikoen bilketa areagotzeko gure proposamenei. Hondakin gehien sortzen den guneak identifikatu eta horietan bilketa sistema indartu daiteke; hori da PSE-EEk proposatu duena Bilduren inposaketaren aurrean “.
Horrez gain, Gipuzkoako ordezkari eta alkateek hartutako erabakiaren berri prentsa bidez jakin zutela salatu dute PSE-EEko zinegotziek, eta “Zarauzko Udalak zerikusirik izan ez duen erabakia” dela, gainera.