Euria, haizea eta itsaso mugituarekin ari dira jokatzen Getarian Gaztetapeko VIII. Surf Txapelketa Herrikoia. Gaztetape Surf Elkartean antolatu du proba, eta bihar ere lehiatuko dira surflariak nahiz bodyboarder-ak.
Orain hamalau urtetik beherako bodyboarder-ak daude uretan. Baina asteburuan zehar, surf modalitatean, open, longboard, master, hamasei urtetik beherakoen eta nesken mailak izango dira; body modalitatean, berriz, open eta hamalau urtetik beherakoak arituko dira lehian.
Aurtengo txapelketak berrikuntza nabarmena izango du, gainera; izan ere, txapelketa ofizialarekin batera, hasiberrientzat zuzendutako txapelketa alternatiboa ere antolatu dute; bertan, txapelketan inoiz aritu ez direnek edota surfean hasiberriak direnek parte hartu ahal izango dute.