Zarauzko Mugikortasun Astean, XIII. Txirrindulari Txiki Eguna ospatzen ari dira. Oraintsu eman diote hasiera ekitaldiari, 10:00ak pasatxo zirela atera baitira Lizardi Institutuko patiotik, eta herriko bidegorri saretik herriari bira eman ondoren, Igerain plazan helmugaratuko dira. 5 eta 14 urte bitarteko hainbat neska-mutil irten dira kalera euren bizikletekin; txikienak gurasoen laguntzarekin. Zarauzko Zikloturismo Elkarteko kideek gidatuta, bi ibilbide antolatu dituzte: 5-8 urte bitartekoek ibilbide laburra egiten ari dira eta 9-14 urte bitartekoek, berriz, ibilbide luzea. Proba hau ez da lasterketa bat, eta bukaeran hamaiketakoa banatuko zaie parte-hartzaile guztiei. Era berean, probako elastiko gorria jaso dute bizikletarekin ibilbidea animatu direnei, eta horien guztien artean mendiko bi bizikleta zozkatuko dute Igerainen bertan.
