Emakumezkoek aurten bi igandetan jokatuko dute Kontxako Bandera, gizonezkoek bezala. Irailaren 2an izango da kanporaketa, sailkapen estropada, gizonezkoen probaren hurrengo egunean.
“Progresio baten fruitua da”, azaldu dute antolatzaileek. “Gero eta maila hobea dago emakumezkoen estropetan, lehiakortasun gehiago”. Eta hori indartu egin nahi izan du Donostiako Udalak.
Erabakiarekin gustura dago Mertxe Aizpurua, Getaria-Tolosa traineruko kidea: “Oso gustura gaude, pauso bat aurrera ematea da”. Proba bi jardunalditan banatzea “juxtuagoa” dela uste du: “Aspalditik iruditzen zitzaigun igande bat gutxitxo zela. Egun bakarra izanda, aldrebestu daiteke. Hala, bi igandetan izanda, onena nor den argiago ikusiko dela uste dugu. Juxtuagoa izango da”.