Sodaramps enpresa arduratzen da skate eskola ibiltariaz, eta jardunaldietarako berak jartzen ditu begiraleak. «Lehenik eta behin, bakoitzaren maila zein den ikusten dugu, eta horren arabera, oinarrizko probak edo garatagoak lantzen ditugu beraiekin», adierazi du Sodaramps-eko arduradun Kepa Crespok. Goizean, 11:00etatik 14:00etara ariko dira, eta arratsaldean, berriz, 16:00etatik 17:00ak aldera arte. Ondoren, skate erakustaldia eskainiko dute eta, amaitzeko, opariak banatuko dizkiete eskolan parte hartzen dutenei.
«Haurrak edozein momentuan etorri ahal izango dute. Ez dute aurrez izenik eman beharko, ezta txandarik edo halakorik hartu beharko ere. Egun osoan bertan izango gara, eta material guztia –patineteak eta kaskoak– guk geuk jarriko ditugu. Gainera, egitasmoan parte hartzea doakoa izango da», zehaztu du antolatzaileak. Goizeko saioan mugimenduak eta trikimailuak erakutsiko dizkiete, eta arratsaldekoan, ikasitakoa praktikara eramango dute, begiraleek prestatuko dituzten probatan. Normalean, 16 urte bitarteko gazteekin aritzen dira, baina Skate Skola Tour egitasmoa skate-an trebatu nahi duen edorentzat irekita dagoela nabarmendu du Crespok.
Bigarren urtez herrian
Surf kultura barneratuta duen herria izanda, Sodaramps enpresarentzat ezinbestekoa zen eskola ibiltaria Zarautzera ekartzea: «Bertan dagoen surf giroa baliatu behar dugu; nolabait ere, surfa eta skate-a modalitate bateragarriak direlako. Izan ere, taula gainean aritzeko filosofia hori betidanik egonda Zarautzen».