Alproja Kultur Taldea gustura agertu da Kalerki jaialdiak izan duen erantzunarekin. «Guztia oso ongi atera da, eta eskerrak eman behar dizkiogu jendeari, emanaldietan parte-hartzeagatik», nabarmendu du Alprojako kide Iraia Eliasek. Izan ere, ehunka lagunek jarraitu dute kale antzerki topaketa, asteburu osoan. «Larunbatean, esaterako, jendetza bildu genuen. Agian, aurreko urteetan baino gehiago. Egia esan, urtero ibiltzen da jendea, baina aurten, larunbatean behintzat, sekulakoa izan da. Tutatis Teatroren zaldiek Malekoia bete zuten arratsaldean, eta Markeliñek, Munoa plaza gauean», adierazi du Alprojako kideak. Oro har, ikusleek asko gozatu dute aurtengo eskaintzarekin.
Halako plaza baten aurrean, antzerki taldeak ere pozik geratu ziren. Zenbaitzuk jendea gerturatuko ote zen kezkatuta egon ziren, baina saioari hasiera eman bezain pronto mamuak uxatu zitzaizkien. Alprojak, esatera, Bakhara lan berria erakutsi zuen: «Sua erabili behar geneuenez, beldur pixka bat geneukan, baina, azkenean, primeran atera zen. Gainera, maskaren erabilerarekin, kuriosoa geratu zen», dio Eliasek.
Programaziotik kanpo, Kukubiltxo taldeak ezkontza berezia antzeztu zuen Musika Plazan, ostiral iluntzean. «Ezusteko moduan ekarri genituenez, jendearen harrituta geratu zen».
