Orioko Amnistiaren Aldeko Mugimenduak antolatuta, datorren larunbatean, ekainaren 18an, I. Elkartasun Eguna izango da. Egunean barrena hainbat ekintza izango dira, beti ere, euskal preso politikoei elkartasuna adieraziz eta haien etxeratzea eskatuz. Honakoa da egun horretarako antolatu duten egitaratua:
- 10:00-10:30 Elkartasun argazkia, Kukuarrin
- 12:00 Hamaiketakoa, plazan
- 13:00 Haur jolasak eta koadrilen arteko herri jokoak
- 14:00 Elkartasun bazkaria, plazan. Menua: Txanpiak; zikiroa entsaladarekin; postrea, kafea eta kopa; eta sagardoa txotxetik
- 18:00 Manifestazioa, plazatik
- Ondoren, omenaldia
- 23:00 Kontzertua, gaztetxean: Izate taldea
Bazkaritarako txartelak Aterpe eta Kolon Txiki tabernetan egongo dira salgai, ekainaren 16ko gauera arte, 20 eurotan. Antolatzaileek herritarrak animatu nahi dituzte bazkaritara eta euskal preso politikoei elkartasuna adierazteko egun horretako ekintzetan parte hartzera. Horretarako honako hitzak helarazi nahi dizkiete oriotarrei:
Garai
berri honetan iritsi zaigu oriotarroi ere askatasun haizea zabaltzeko
eta bultzatzeko garaia. Iritsi zaigu euskal herritarrak, eskubide
guztien jabe, Euskal Herrian bizi gaitezen, inongo lotsarik gabe
aldarrikatzeko garaia. Iritsi zaigu espainiar eta frantziar estatuen
atzaparretan bahiturik ditugun euskal preso politikoekiko elkartasunari
bidea egiteko garaia.
Euskal preso politikoei ezarri zaizkien
muturreko egoerak ondorio latzen sortzaile dira. Sakabanaketa politikak
istripuak eragiten jarraitzen du, presoak urruntzen eta bakartzea
areagotzen. Biziarteko espetxe zigorra legeztatu dute praktikan, kondena
betea izan arren preso politikoak preso mantentzen dituztelarik
Entzutegi Gorenaren doktrinaren bidez. Gaixotasun larriak dituzten
euskal preso politikoak espetxean preso mantentzen dituzte, berdin
minbizia izan, berdin eritasun psikologiko larriak izan. Espetxeak
ukazioaren zurrunbilo bilakatu dira euskal preso politikoentzat.
Bestalde, espetxe politika honek, desgaste ekonomiko izugarria dakar non
elkartasuna eta herritarren laguntza ezinbestekoak diren.
Euskal
Herrian preso politikoak egon diren denbora guztian, beraiekiko
elkartasunak beti iraun du bizirik. Preso politikoak egoteak preso
politikoekiko elkartasuna dakar naturalki. Gure herrian bertan urte
guztian zehar hainbat ekimenen bidez saiatzen gara espetxeen eta gure
herriaren arteko distantzia laburtzen.
Azken
hilabeteotan Euskal Herrian aro politiko berri bat ireki da, non eragile
politiko, sozial eta sindikal ezberdinek bat egin duten benetako
konponbide prozesu bat bururaino eramateko ahaleginean. Zentzu honetan,
euskal preso politikoen etxeratzea izango da abian den prozesu honek
utzi beharreko ondorioetako bat.
Festa honen
helburua edozein euskal preso politikok eta beraien senide nahiz
gertukoek bizi duten eguneroko egoera azaleratzea da. Beste euskal
herritarren pare Orioko herritarrek jasan behar izan eta izaten dituzten
eskubide urraketak argitara atera eta norabide elkartu batean lan egin
nahi dugu. Herritarrengan informazioa zabalduz, Euskal presoak eskubide
guztien jabe Euskal Herrian izan arteko indarrak biltzen jarraitzeko
pauso garrantzitsu bat izango da Orioko I. Elkartasun Eguna. Jakitun
gara hau ez dela egun batetik bestera emango, eta jakitun gara
beharrezkoa izango direla herritarren presioa eta mobilizazioa.
Honela
bada, herritar guztioi dei egin nahi dizuegu Ekainaren 18an Orioko
kaleak elkartasunez betetzera, baita aurrerantzean egingo ditugun
mobilizazioetan parte hartzera ere.