Patxi Elola izango da Zarauzko PSE-EEko hautagaia. Zumaian, berriz, Emiliano Cabañas izango da zerrendaburua, Orion Jesus Rodriguez Pousa eta Getarian Joxean Elola. Aian estreinakoz izango du alderdiak ordezkaria, Alberto Agirrezabal.
Mankomunitaterako nahiak
PSE-EEk bi egiteko nagusi izango ditu Urola Kostako Udal Elkartean. Batetik, enplegua sustatzea izango da helburua; bestetik, “hondakinen kudeaketa egokia” bideratzea. Cabañas izan da azken lau urteotan erakundeko lehendakari ordea eta UKUEren eginbeharra “zaborren kudeaketaz haratago” dagoela jakinarazi du: “Urtero enpresei aholkularitza eskaintzen zaie, baita ikastaroak eta zenbait gaiei lotutako programak ere. Horretaz gain, GKEei diru-laguntzak ematen dizkio, besteak beste”.
Hondakinen kudeaketari dagokionez, “eztabaida hutsala” sortu dela nabarmendu du Zumaiako PSE-EEko hautagaiak: “2013an errauskailua martxan izatea espero dugu, eta bide batez, inongo oinarri teknikorik ez dituzten eta atzean interes politikoak dituzten eztabaida hutsalak amaitzea”.