Artazok irabazi zuen larunbateko idi-dema Aian

Larunbat gauean jokatu zen, Aiako probalekuan 200 lagun inguru zirela, idi-dema eta Jabier Ariztiren eta Aitor Juaristiren idien arteko desafioa izan zen. Lanean aurrena Legazpiko Jabier Arizti Olaberri aritu zen eta 46 plaza eta 1,92 metro egin zituen. Honen ondoren Aitor Juaristi Artazo elgoibartarrak egin zituen lanak eta 29 minutu eta 24 segundo behar izan zituen Olaberri-ren marka tapatzeko.Beraz, Artazo izan zen jaun eta jabe eta 2.000 euro poltsikoratu zituen.

Irigoieni desafioa

Bestalde, larunbat eguerdian, Aiako Iturriozena Kafetegi-okindegian elkartu ziren Aiako Idi Probak Elkartekoak eta desafioa bota zioten Aimar Irigoien harrijasotzaileari: Joxe Antonio Gisasola Zelai-k Soraluzen 1985eko uztailaren 23an 10 arroako zilindro zaharrarekin egindako marka ezetz gainditu. 5 minutuko hiru tandatan, tandatik tandara 15 minutuko atsedenarekin, 123 jasoaldi egin zituen Zelai-k.

Ekainaren 19rako egin dute hitzordua; Aiako dema-plazan jokatuko da apustua eta 12.000 euro izango dira jokoan. 69,5 zentimetroko harria, 30 ontzakoa, 140 arroako zilindro zaharra erabiliko dute eta ezingo du berunik izan itsatsita. Errezildarrak bi laguntzaile izango ditu aldamenean.