Eduki hau partekatzeko esteka arbelera kopiatu da.
Lehiatzeko aukera izatea soilik "berri ona" izan dela dio Alberto Gorritiberea zinemagile zumaiarrak. Malagan (Espainia) dago, Harriya filma, bere azken lana, hiriko zinemaldian lehiatzekoa baita. "Esperoan gara, ea berri on gehiago izaten dugun".
Ikusleei gustatzea izango litzateke, zuzendariaren arabera, lehen berri ona. Eta saria bigarrena: "Ez dugu sariagatik lan egiten, ez ditugula nahi esaten dugu... Baina ea ematen diguten!", dio. Bihar eguerdirako jakinaraziko dute zein filme saritu duten.
Malagako esperientzia "frogatzat" du Gorritibereak: "Gisa horretako film batek Euskal Herritik kanpo nolako harrera duen neurtzeko balioko digu. Horregatik ikusi nuen Malagako Zinemaldia begi onez, hasiera-hasieratik".
Bidaiaren hasiera baino ez da izango. Eta Euskal Herrian estreinatzeko data jarri ez badute ere, udazkenari begira aurkeztuko dutela jakinarazi du zumaiarrak.