Herritarren segurtasuna bermatzearren, Zarauzko Kirol Patronatuak bi desfibrilagailu eskuratu ditu. Kirol zinegotzi Iban San Martinek jakinarazi duenez, horietako bat Astin kokatu dute, futbolarien aldagelen alboan; bestea, berriz, Udal Kiroldegiko harreran.
San Martinen arabera, ez da mediku-ezagutzarik izan behar tresna erabiltzeko. Ikastaroa jaso izana nahikoa da defibrilagailua erabili ahal izateko. Ildo horretatik, Kirol Patronatuak ikastaroa antolatu du datorren hilaren 7rako. 10:00etan izango da hitzordua, Kiroldegiko aretoan. Herritar orok har dezake parte ikastaroan.
Desfibrilagailuaren abantailak
Desfibrilagailua bihotz-birika gelditze kasuetan erabiltzen da. Bihotz erritmoa egonkortzen laguntzen duen tresna da honakoa. Aparatuaz gain, beste hainbat tresna kokatu dituzte aipatu lekuetan: desfibrilagailua egoera onean dagoen erakusten duen eta tresna mugitu dutela adierazten duten zaintza sistemak.