Asteazkenean hasitako greba mugagabea bertan behera utzi dute TS Fundiciones-eko langileek. Gaur goizean euren aldarrikapenak eskualdean zehar zabaltzeko egin duten auto karabanaren ondoren jaso dute berria: enpresako zuzendaritzak langileen eskakizun guztiak aintzat hartu eta beteko ditu. “Puntu denak adostu ditugu eta greba deskonbokatu dugu, astelehenean hasiko gara lanean”, adierazi dute langileen ordezkariek.
Honenbestez, urteko lan jarduna 1.593 ordutan mantenduko da eta joan-etorriengatik kobratu beharreko gehigarriak datorren hilean jasoko duten soldatan ordainduko zaiela jakinarazi dute sindikatuek.