ELA, LAB,STEE/EILAS eta EHNE-HIRU sindikatuek langileen eskubideak aldarrikatzeko elkarretaratzea egin dute gaur eguerdi aldera. ELAren egoitzaren atariko Bizkaia kaleko biribilgunean elkartu dira lau sindikatueko ordezkariak, hilaren 27an Donostian egingo duten manifestazioa “sozializatzeko” asmoz. “Herritarrak grebarekin bat egin dezaten dei egitera gatoz” adierazi du ELAko kide batek.
Hala, biribilgunearen bueltan bildu dira, eta oihuka langileen eskubideak aldarrikatu dituzte, pentsio duinak eta soldata izozketarik ez izatea, esaterako. Era berean, bertatik pasatzen ziren autoei pentsio izozketarekin ados ez badaude bozina jotzeko eskatu diete.
Greba orokorra
Hilaren 27an GIpuzkoa mailako greba orokorra egingo dute Donostian. Horretaz gain, ELAko kide Joxe Anjel Urbietak jakinarazi duenez, eskualdean mobilizazioak antolatu dituzte 27ra bitartean. ”Datozen egunotan Urola Kostako enpresetan batzarrak egingo ditugu langileak mobilizazioen eta aldarrikapenen inguruan informatzeko, eta langile batzarrak ere egingo ditugu, gure ikuspegia zabaltzearren”, nabarmendu du Urbietak. Bestalde, grebaren bezperan, urtarrilaren 26an alegia, kotxe karabanak izango dira eskualdeko herrietan zehar.
Hilaren 27an, berriz, Donostian egingo duten manifestazioaz gain, Zarautzen zein Azpeitian elkarretaratzeak izango dira, 18:00ak aldera.