San Miguel Pro Zarautz, Munduko Surf Zirkuituko proba, FAN 2010 sarien barruan aukeratu dute, urteko surf ekitaldirik onenaren kategorian. Hilaren 20an, astelehenean, Bartzelonako Apolo aretoan izango den gala berezian banatuko dira sariak. “Errekonozimendu polita izango litzateke, Zarauzko Surf Elkartean urtero txapelketa aurrera eramateko lanean aritzen garen guztiontzat. Aurten koska handia igo dugu, sei izarrekoarekin, eta arrakasta erabatekoa izan da”, adierazi du Mikel Landa ZSEko lehendakariak.
Iaz jarri zituzten abian FAN sariak. Oro har, akziozko kiroletan banatzen dira (surf, skateboard, snowboard, wakeboard, BTT…), kirolariei, kazetariei, komunikabideei zein kirol-probei. Aditu batzorde batek hartzen du erabakia. www.trickon.com ataria zuzenean emango dute gala.
