Putzuzulo Amets Fabrikak pasa den urriaren 30ean bost urte bete zituen. Bost urteko ibilbidea ospatzeko egitarau betea antolatu dute azaroaren 21a bitartean. Hala, gaur ‘Emayonk lori’ Pala txapelketako Ligako eta Kopako finalak jokatu dituzte, Manuelako frontoian, eguerditik aurrera. Ligako partidan Oliden eta Txapo oriotarrak Motz eta Manaki zarauztarren aurka jokatu dute. Azken horiek gailendu dira, 25-13 puntuazioarekin.
Kopako finalari dagokionez, Gazta-Egoi eta Mikel-Beñat bikoteak aritu dira lehian. Lehenengoak nagusitu dira. 25-17 egin dute.
Herri bazkaria eta kontzertuak
Ligako eta Kopako partiden ostean, 15:00ak aldera herri bazkaria egin dute Gaztetxe atarian. Herritar ugari bildu da bertan, eta menu berezia jan dute: kalabaza purea, arroza, intxaurrak eta gazta. Edatekorik ere ez da falta izan. Gauean, berriz, Zaratafest ekitaldia izan da. Bertan hainbat taldek kontzertua eskainiko dute, Ira et Decessus, Fly Shit, Criatura, Totallickers, Powerflip eta Mistkafer taldeek, hain zuzen.
