Sorginak Emakume Gazte Asanbladak ‘Emakumea eta artea’ mahai ingurua antolatu du astelehenerako, Putzuzulo Gaztetxearen bosgarren urteurreneko ospakizunen baitan. Ekimenak hainbat arlotako emakumeak bilduko ditu eta askotariko gaiez arituko dira: zein leku duen emakumeak artean, zeintzuk diren oztopo nagusiak eta nola bizi duten egoera, besteak beste. Uxue Alberdi idazlea eta bertsolaria, Maite Arroitajauregi ‘Mursego’ musikaria eta Concetta Probanza margolari izango dira jardunaldiko gonbidatuak. Hitzordua Gaztetxean bertan izango da, 20:30etan.