Bihar, azaroak 9, hasi eta igandera bitartean Mendi Astea izango da Zestoan, Agiro Mendi Taldeak antolatuta, Zestoako Udalaren laguntzarekin. Asteartean, asteazkenean eta ostegunean hitzaldiak eta ikusentzunezkoak izango dira, 20:30ean, Kultur Etxeko zine aretoan. Asteartean, Jon Segurolako Fiz Roy espedizioko bideoa emango du. Asteazkenean, Hur Lertxundik istripuei nola aurre egin, elikaduraz eta entrenamenduez hitzaldia emango du. Ostegunean, Everestetik itzuli berria den Alberto Zerainek Kangchenjunga mendira egindako espedizioaz jardungo du. Mendi Asteari bukaera emateko, igandean, azaroak 14, haurrentzako goiz ibilaldia antolatu dute, 09:00tan Gurutzetik irtenda; Aizarna-Munoaundi- auzo gaina-Zestoa itzulia egingo dute.
Mendiko federatu txartela ateratzeko
Bestetik, datorren urterako mendiko federatu txartela atera nahi dutenek txartela ateratzeko bete beharreko orriak Kultur Etxeko aretoan edo Kiroldegian izango dituzte. Agirokoek azaldu dutenez, orriak beteta itzultzeko azken eguna hilaren 26a da.