Aulki Mugikorreko FER txapelketak jokatu zituzten igandean Legutioko (Araba) lakuan, eta Orio Arraunketa Elkarteko (OAE) arraunlariek emaitza bikaina lortu zituzten. Absolutu eta paraolinpiko mailako txapelketa izan zen, eta skull laukoan urrezko dominarekin itzuli ziren etxera gizonezko absolutuak. Leandro Salvagnok, Marcos Sarrautek, Martin Gonzalezek etaGorka Arrojeriak osatu zuten laukoa.
B ontziak, berriz, seigarren egin zuen: Axel Atorrasagastik, Imanol Iruretagoienak, Aimar Ikatzetak eta Inhar Gastianek osatu zuten lauko hori.
Gizonezko absolutuetan, skiff bakarkakoan ere dotore ibili ziren oriotarrak, zilarra eskuratu baitzuen Koxme Burutaranek. Modalitate berean, bederatzigarren sailkatu zen Imanol Sarasua.
Emakumeek ere lan ederra egin zuten skull bikoitzean, maila absolutuan, brontzezko dominarekin etxeratu baitziren Jare Miralles eta Uxue Olaskoaga.
OAEko Jare Miralles eta Uxue Olaskoaga, eskuinean, brontzezko dominekin. (OAE)