Iaz bezala aurten ere, Espainiako Selekzioaren deialdian sartu dute Koxme Burutaran arraunlari oriotarra, asteburu honetan Banyolesen (Herrialde Katalanak) lortutako emaitza onengatik. Hain justu, Udaberriko Openerako probak izan dira larunbatetik igandera, eta Orio Arraunketa Elkarteko arraunlariak absolutu gizonezkoetan parte hartu du.
Orioko klubak, halaber, beste lau arraunlari aurkeztu ditu probetara. Jubenil nesken kategorian 24 partaide izan dira guztira, tartean Jare Millares eta Uxue Olaskoaga oriotarrak. Hamargarren postua eskuratu du Millaresek, eta hamabosgarrena, aldiz, Olaskoagak. Jubenil mutilen kategorian, lemazain gabeko bikoan, 31 arraunlarik hartu dute parte, eta hamaseigarren egin dute Aimar Ikatzetak eta Gorka Arrospidek. Eta azkenik, gizonezko absolutuetan, skiff bakarkakoan, zortzigarren izan da Koxme Burutaran, 13 partaideen artean.