Danbolin musika eta dantza eskolako ikasleek urteroko dantza emanaldia eskainiko dute otsailaren 22an, igandearekin. Hain justu, Karela kiroldegian izango da ikuskizuna, eta iaz bezala, aurten ere saioa bitan banatuko dute: 13:00etan izango da lehen txanda, eta 17:00etan bigarrena.
Lehen txandan 4 eta 6 urte arteko 84 ikaslek hartuko dute parte, eta euskal dantza oinarri hartuta prestatu dituzten koreografiak egingo dituzte. 17:00etan, berriz, 7 eta 13 urte arteko 132 dantzari aterako dira jendaurrera, euskal dantzak eta bestelako koreografiak interpretatzera.
Haiekin batera izango dira eskolako instrumentuko ikasle eta irakasleak, baita Harribil dantza taldeko kideak ere.