Mingain urdinaren kasu bat atzeman dute Orion

Julene Sorarrain 2025ko abu. 27a, 16:00

Behi bat. (pixabay)

Orion agertu da mingain urdinaren 3. serotipoaren lehen kasua Gipuzkoan. Lurraldean ez ezik, Bizkaian ere gaitz bera duen positibo bat agertu da Enkarterrialden, hain zuzen ere. Prebentzio neurri gisa, Gipuzkoako Foru Aldundiak ganaduzaleei abelburuak gaitz honen aurka txertatzeko gomendatzen die. 

Euskal Nekazarien Batasuna (ENBA) elkarteak jakinarazi du Orion mingain urdina gaitza duen behi bat atzeman dutela. Behia aurrez txertatua zegoela zehaztu dute elkartetik, eta horrenbestez, ondorio "oso arinak" izan ditu. Ez da kasu bakarra izan Araba, Bizkai eta Gipuzkoan, izan ere, Enkarterrialden (Bizkaia) ere 3. serotipoaren positibo bat agertu da, baita behi batean ere.

Hori horrela, Gipuzkoan gaitz honen txertaketa kanpaina amaitzear dagoela adierazi dute, eta amaierarako, ardien %43 eta behien %9 txertatuak izatea aurreikusten dute. Bizkaian, aldiz, txertaketak aurrera jarraitzen dute eta Arabaren kasuan, berriz, oraingoz ez da positiborik agertu. 

Prebentzio neurri gisa, Gipuzkoako Foru Aldundiak ganaduzaleei abelburuak 3. serotipo honen aurka txertatzeko gomendatzen die, aurretik zabalik egon den borondatezko kanpainan parte hartu ez badute. Halaber, Aldunditik zehaztu dute laster emango zaiela ganaduzaleei 3., 4. eta 8. serotipoaren aurka udazkenean hasiko den txertaketa kanpaina berriaren inguruko informazioa.

Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide