Denbora luzez Orioko Futbol Taldea harmailatan pilatzen den zaborraren inguruan ohartarazpenak egiten aritu da. Hala ere, egoerak bere horretan jarraitzen duenez, neurriak hartzea erabaki dute arazo tamalgarri honi aurre egiteko.
Ohikoa izan da betidanik futbol zelaira kanpoko dendetatik erositako janaria eta edaria sartzea, partidak behatu bitartean ikusleek tripak ase ditzaten. Horrek, ordea, zabor ugari sortzen du, eta askotan zaleek hondakinak edukiontzietara bota beharrean lurrera botatzen dituzte, harmailak zikinak utziz.
Horregatik, Orioko Futbol Taldeak kanpotik ekarritako janari eta edarien sarrera debekatu du, zelaiaren ingurua garbi mantentzeko asmoz. Aspalditik abisatu izan dute: zaleek zaborra behar bezala bota ezean, neurriak hartu beharko zituztela. Orain, egoerak ez du hobera egin eta, ondorioz, zabor bihur daitekeen edozer zelaira sartzea debekatuta geratuko da.
Hala eta guztiz ere, barruko taberna zabalik egongo da, eta bertan janaria eta edaria erosteko aukera izango dute ikusleek.