Irribarreak eta lagunarteko giroa izan dira protagonistak gaur goizean Zaragueta Herri Eskolaren atarian. Izan ere, dozenaka haur batu dira bertan, XVI. Kros Txikian parte hartzeko gogotsu. HH2. mailatik hasi eta LH6. mailara arteko haurrek jokatu dute sariketa; ziztu bizian egin dute guztiek ibilbidea, gurasoen txalo zaparrada eta animo oihuen artean.
Mailaka banatu dituzte haurrak, eta txandaka jokatu dituzte lasterketak. Aurretik, ordea, lesioak ekiditeko beroketa saioak ere egin dituzte, ariketa eta jolas dibertigarriekin. Helmugara lehena edo azkena iritsi, inor ez da esku hutsik joan etxera, parte hartu duten guztiek jaso baitituzte domina eta opiltxoa lasterketaren amaieran.