Gipuzkoako Euskal Pilota Federazioak (GEPF) zuzendaritza eta presidente berria ditu hilaren 1etik. Izan ere, martxoaren 25ean amaitu zen Zuzendaritza Batzorderako hautagaitzak aurkezteko epea, zerrenda bakarra aurkeztu zen, eta helegite epean erreklamaziorik egon ez denez, amaitutzat eman dute prozesua. Hala, Iñaki Lizaso villabonarra izango da presidente berria. Zuzendaritzako hamalau kideen artean, berriz, oriotar bat egongo da: Ibon Aranalde Orioko Ospele pilota elkarteko presidentea.
Aranaldek Gukari kontatu dio "betidanik harreman estua" izan dutela Lizasorekin, "pilotari ibilbidean aurrena, eta klubaren ardura hartutakoan, gero, bi kluben artean ere bai". Lizaso aurrez ere federazioko zuzendaritza taldean zebilen, eta bere burua aurkeztuko zuela eta ea taldeko kide izan nahi zuen galdetu zion Aranalderi. Horrek eskaintzari baiezkoa ematea erabaki du, "Gipuzkoan euskal pilota indartzen jarraitzen laguntzeko".
Aranaldek ez du ahaztu nahi herrian "egoera zailean" egongo direla aurki, "irailetik aurrera frontorik gabe" geldituko direlako –etxeak egingo dituzte hor eta pilotaleku berria oraindik ez dute eraiki– eta argi du bere lehentasuna pilota eskola aurrera ateratzea eta herriko pilota zaletasuna mantentzea izango direla. Zentzu horretan ere, uste du erabaki ona dela herriko klubeko kide bat federazioan egotea: "Egoera zail honi aurre egiteko Orioko pilota elkartearentzat onuragarria izango delakoan nago".