Urdaibai eta Hondarribia hasieratik jarri dira Donostiarraren eta Orioren aurretik Aresko estropadako ohorezko txandan, eta bien artean egon da borroka beste behin. Dena den, azken minutuetan aurreratu egin da Urdaibai, eta nagusitasunez irabazi du estropada, Hondarribiari zortzi segundoko aldea aterata.
Orio hirugarren sailkatu da, hemezazpi segundora baina Donostiarraren aurretik eta, beste behin, Ander Etxegoienek jantzi du patroi onenaren elastikoa.
Getaria bigarren txandan lehiatu da, eta gaur zazpigarren sailkatu diren arren, sailkapen nagusian bosgarren jarraitzen dute, sendo, Orioren atzetik. Oriok ere ziurtatuta du laugarren postua sailkapenean.
Bihar izango da ligako azken hirugarren estropada, 12:13ean, Galiziako Boiro herrian. Lau puntuko aldearekin da orain Urdaibai lehen postuan, eta Hondarribia bigarren. Biharkoa eta gero, bi estropada bakarrik geldituko dira liga amaitzeko, biak Bizkaian –eta tartean Kontxako Bandera–: Bermeokoa irailaren 19an, eta Portugaletekoa irailaren 20an.
