Hotzik ez zen batere gaur 04:30ean Orioko kaleetan, eta ordurako leiho batean baino gehiagotan ikusten ziren etxeetako argiak piztuta. 04:30erako elkartu dira plazan 22. Korrikako lekukoa herrigunetik urrunen zutenak, garaiz iristeko beren tokietara. Zarauztik iritsi da jende uholdea, eta oriotarrek ere bikain erantzun diote euskararen aldeko ekimen berezienari. Haur, gazte, heldu eta zahar, asko eta asko izan dira errepidera atera direnak Korrikari ongietorria ematera.
Herrigunean buelta egin, eta Usurbil alderantz jarraitu du Korrikak errepide nagusitik. Korrika saioa amaituta, plazan txokolate beroa hartzeko aukera izan dute herritarrek.
Argazkiak: AEK eta Onintza Lete Arrieta.