'Bizitzaldiak' hitzaldi zikloa izango da ekainean zehar Orion

Bizitzaldiak hitzaldi zikloa egingo dute Orioko Gaztetxean. (Aiora Larrañaga/Hitza) Bizitzaldiak hitzaldi zikloa antolatu du Orioko Etxeluze Gaztetxeak, ekainerako. Hiru saio izango dira, eta gaztetxean bertan egingo dituzte. Ostegunean, ekainaren 8an, 19:00etan eskainiko du lehen hitzaldia Joseba Tapiak, Larreko eskolatik: trikitixarekin gozatzeko apunteak gaia izango du hizpide. Ekainaren 15ean, Estitxu Fernandez Maritxalar izango da hizlari gonbidatua, eta Bizitzaren hasiera. Gure erditzearen jabe hitzaldia eskainiko du, 19:00etan hasita. Ekainaren 22an egingo dute azken saioa. Azkena ez da hitzaldia izango, gurasoek eta haurrek ondo pasatzeko bilgunea baizik. 17:00etan hasita, haurrentzat txokolatada eta jolas osasuntsuak antolatuko dituzte gaztetxean, eta gero kalejira egingo dute herrira.