Bide heziketa ikastaroa antolatu du Orioko Udalak herriko bi ikastetxeetako ikasleentzat

Orioko plaza ingurua. (Aiora Larrañaga/Hitza) Mikal Etxeberria udaltzainak proposatu zion udalari Orioko bi ikastetxeetan bide-heziketari buruzko ikastaro bat ematea, trafikoarekin zerikusia duten istripuak ekidin eta mugikortasun segurua bultzatzeko. Udalari ideia interesgarria iruditu zitzaion, eta urriaren 10ean abiatuko dituzte bide-heziketa eskolak herrian. Mikal Etxeberria udaltzaina izango da irakasleak, eta hilabete batez Zaragueta Eskolako eta Orioko Herri Ikastolako Lehen Hezkuntzako 3. mailatik 6. maila bitarterako 312 ikasleek bide-heziketa landuko dute berarekin. Gela bakoitzean ordu beteko hiru saio emango ditu Etxeberriak; bi ordu teoriko, eta beste bat praktikoa. Azken hori kalean egingo dute, eta ikasgelan ikasitakoa praktikan jarriko dute ikasleek. Ekimenarekin Orioko Udalak mugikortasun seguruaren ezagutza eta kontzientzia sortu nahi du haurrengan.